Is it true? - Söng Jóhanna Guðrún í Moskvu þetta árið,
aðeins nokkrum mánuðum eftir að fréttir bárust heimsbyggðinni og okkur saklausu
Íslendingunum að landið væri komið á hliðina í mörgum skilningi. Fjármál
einstaklinga og fyrirtækja tóku stakkaskiptum á stuttum tíma, breyttar áherslur
í viðskiptum litu dagsins ljós og ákvarðanir í markaðsmálum og auglýsingagerð
tóku breytingum. Það má því segja að árið 2009 hafi að mörgu leyti farið
í leit lausna hjá okkur, samstarfsaðilum og viðskiptavinum, nýrra lausna í
breyttu landslagi í markaðsmálum- ágætis áskorun þar.
Í byrjun árs höfðu margir auglýsendur hægt um sig enda víða
óvissa um framtíð fyrirtækja. Hægt og rólega fóru hlutirnir að glæðast,
nýjar strategíur settar upp fyrir næstu mánuði, aðrar áherslur settar í forgang
og áfram var haldið. Talsvert var birt af eldra efni, sjónvarps- og
útvarpsauglýsingum sem voru til og því eitthvað minna um prent auglýsingar en
áður. Áður en langt um leið var þó framleiðsla á grafískum sjónvarpsauglýsingum
komin á fullt skrið og því má segja að auglýsendur hafi haldið sig talsvert við
sjónvarp þetta árið. Rekstur Skjás eins hefur gengið erfiðlega og á
tímabili leit út fyrir að stöðin myndi hverfa af markaði en í nóvember hófst
áskriftarsala í þeirri von að halda stöðinni á lífi og eru komnir rúmlega 20
þúsund áskrifendur í lok þessa árs. Íslenskt dagskrárefni hefur gengið vel eins
og síðustu ár, Útsvar, Spaugstofan, Marteinn, Wipeout, Fangavaktin og Auddi og
Sveppi hafa dregið marga að skjánum að undanförnu. ÍNN hefur aukið
dagskrágerð sína talsvert á árinu og finna fyrir auknu áhorfi skv.
áhorfskönnunum sínum.
Ný útvarpsstöð, Kaninn, leit dagsins ljós á
árinu. Hlustun á þeirri stöð hafa ekki verið með í PPM mælingum Capacent
en mun þar verða breyting á á nýju ári. Verður spennandi að sjá hvernig
þeirri stöð gengur á annars fámennum markaði. RÚV og Bylgjan hækkuðu
verðskrar sínar á árinu.
Dagblaðamarkaðurinn hefur aðeins breyst á árinu.
Meðallestur dalaði eftir því sem líða tók á árið sem er í samræmi við
breytingar á útgáfu og dreifingu. Fréttablaðið dró úr dreifingu í
heimahús á landsbyggðinni og hætti með sunnudagsútgáfu sína á blaðinu. Nú í
haust bættu þeir dreifinguna með því að gera samning við N1 um dreifingu
Fréttablaðsins í þéttu dreifikerfi N1 stöðva á landsbyggðinni. Helgarblöð
Morgunblaðsins koma nú bæði út á laugardagsmorgnum og því er ekkert
sunnudagsblað gefið út á Íslandi í dag. DV kemur nú út 3 sinnum í viku, en er
ekki með í fjölmiðlamælingum Capacent Gallup. Lestur á dagblöðum hér á landi er
þó enn talsvert mikill í samanburði við löndin í kringum okkur.
Viðskiptavinum okkar og samstarfsstofunni Fíton gekk vel í
Lúðraöflun fyrr á árinu. Margar tilnefningar og sigrar í nokkrum flokkum.
Tilnefningar fyrir Vodafone, N1, Iceland Express, Fítonblaðið, Borgarleikhúsið,
Morgunblaðið og Mænuskaðastofnun og sigrar í eftirfarandi flokkum:
Sjónvarpsauglýsingar: Skítt með kerfið fyrir Vodafone
Útvarpsauglýsingar: Jóla-jóla fyrir Vodafone
Vöru-og firmamerki: Merki Borgarleikhússins
Markpóstur: Colourful Reykjavík fyrir Iceland Express
Val fólksins: Vodafone
Dominos og auglýsingastofið Ó-ið vann einnig tímaritaauglýsingu
ársins fyrir auglýsinguna “Heitar pizzur”.
Markaðsverðlaun ÍMARK voru veitt nú í haust. Vodafone og N1
voru tilnefnd sem markaðsfyrirtæki ársins og Hermann Guðmundsson forstjóri N1
hlaut titilinn Markaðsmaður ársins. Tilnefningarnar, viðurkenningar og
sigrarnir marka gott markaðsstarf fyrirtækjanna sem við erum stolt af að hafa
tekið þátt í. Aðrar samstarfsstofur hafa einnig verið að ganga
vel á árinu. Pipar sameinaðist Himinn og haf og tóku upp nafnið Pipar/TBWA og
hafa þar með aukið viðskiptavinaflóru sína.
Á vormánuðum tókum við þátt í kosningabaráttu með
viðskiptavinum okkar, Vinstri grænum og Samfylkingunni. Unnið var stíft á
tveimur stöðum með kosningateymum flokkanna við rannsóknavinnu, greiningum á
skoðanakönnunum og ýmsum rannsóknum varðandi fylgi flokkana.
Á haustmánuðum
jókst framleiðsla auglýsinga og gamli krafturinn sýndi sig á ný. Næstu mánuðir
líta út fyrir að vera spennandi og verkefnavinna fyrir fyrstu mánuði komandi
árs löngu hafin. Samfélagsvefir og netið eru farnir að hafa meiri áhrif á
markaðsstarf heldur en áður og mörg fyrirtæki farin að nýta sér það til
muna. Árið 2010 munu netmál fyrirtækja og
frekari nýting þess toppa sem aldrei fyrr.
Við erum full
tilhlökkunar fyrir næsta ár og erum viss um að með áframhaldandi jákvæðni,
góðri skipulagningu og lausnavinnu náum við sama góða árangri með fyrirtækjum
okkar og sýndi sig 2009.
Gleðilegt 2010!
