Tíma fólks á netinu er í síauknu mæli eytt á ýmsum netsamfélögum og eru Íslendingar virkir þátttakendur í mörgum þeirra.  Flestir þekkja Facebook og YouTube nokkuð vel en Twitter, Flickr, Foursquare og Delicious sem dæmi eru minna þekkt.  Mörg fyrirtæki hafa þreifað sig áfram á þessum samfélögum í þeim tilgangi að eiga samskipti við viðskiptavini sína og efla vitund um vörumerkið sitt.  Sumir eru ennþá talsvert ráðvilltir, margir gera þetta mjög vel og nokkrir eru snillingar á þessu sviði. Mælikvarðinn á árangri er líklega misjafn í huga fólks en eitt er víst að fjöldi fylgjenda er aðeins einn af fleiri þáttum til að mæla árangur.  Það sem þeir sem skilja netsamfélög til fullnustu eiga sameiginlegt er að þeir nota svæði vörumerkisins sem eins konar miðil, eigin miðil (e. owned media) vörumerkis eða fyrirtækis.  Slík notkun í bland við auglýsingabirtingar (e. paid media) og umfjallanir (e. earned media) getur átt mikinn þátt í velgengni fyrirtækja á sínum markaði. Heimasíður og bloggsíður fyrirtækja teljast einnig til eigin miðla vörumerkja þótt slíkt teljist ekki til netsamfélaga sem stýrt er af öðrum.

Eigin miðla má nota á ýmsan hátt. Þegar auglýsingabirtingar eru í gangi er líklegt að fylgjendur taki við sér og segi frá, spyrji spurninga eða komi með athugasemdir varðandi vörumerkið á fyrirtækjasíðum netsamfélaga eins og Facebook eða Twitter. Slík innlegt geta bæði verið jákvæð og neikvæð, en hvoru tveggja getur verið gagnlegt fyrir stjórnendur vörumerkisins að vita af. Neikvæðri gagnrýni skal ávallt svara ef kostur er jafnt við þá jákvæðu. Einnig má framleiða efni eins og myndbönd, ljósmyndir eða leik,  kynna viðburð eða efla til samskipta inná síðunni í þeim tilgangi eingöngu að fylgjendur upplifi viðhorf eða eiginleika karakters vörumerkisins. Fjöldi heimsókna, innlita og áhorfs til dæmis á myndbönd sem eru birt, segja mikið til um ágæti efnisins hverju sinni.  Reglan í þessu eins og mörgu öðru er að ef skemmtanagildi efnisins er gott, er líklegra að fólk dreifi efninu sín á milli.  Það er með þetta eins og flest annað, eftir því sem meira er lagt í hlutina eru fólk og fyrirtæki líklegra til að ná árangri.

Bryndís Björnsdóttir

Pistill birtur í Viðskiptablaðinu 12.maí 2011